خواطر بتاعتي مش بتاعة أحمد الشقيري

الموضوع ده مش للنشر ... يعني ماحدش يعمله شير

الأسم / أحمد 

العمر / 21 سنة و 3 أيام 

المؤهل الدراسي / ثانوية عامة على 3 سنوات

الكلية / بقالي 3 سنين في أولى مدني هندسة الأسكندرية 

الأهداف / لا يوجد 

الموهبة / لا يوجد 

الشخصية / مش عارف .. بس هيا أكيد مش قوية 

الثقة في النفس / منعدمة 

التوجه السياسي / الناس قالت عليا "شيوعي - إشتراكي ثوري - علماني - إخواني " بس مافيش حد قال عليا ليبرالي مش عارف ليه 

المهارات /

أنظمة تشغيل : Microsoft Windows , GNU/Linux "Ubuntu - Debian - Fedora - CentOS"

لغات برمجة :HTML , Python , basic , Fortran .

برامج : PhotoShop , Microsoft FrontPage , Microsoft Word , Microsoft Excel , Microsoft PowerPoint , AutoCAD .

عن نفسي :

أنا شخص بقالي 21 سنة عايش و لم أحقق أي شيء في حياتي ومش عندي أي هدف عشان أحققه 

يعني تقدر تقول عايش كدة وخلاص , عايش مستني الموت يجيلي

وصل بي التفكير إلى أسئلة من نوعية : "أنا عايش ليه ؟" , "ربنا خلقني ليه ؟" أسئلة قد تؤدي إلى الإلحاد عشان موضة اليومين دول. 

تقريبا مش بعمل حاجة صح في حياتي .. حتى الصلاة مش بصلي غير كل فين و فين 

عدد قليل من أصحابي شايفين أني حلو في مجال الـ "Tech" .. بس أنا في الحقيقة مش شايف حاجة 

عمري ما شيلت مسئولية ولا عايز أشيلها 

دئما أسأل نفسي : "يعني أنا لو خلصت كلية هعمل إيه بعد ما أخلص ؟ " و دائما لا أجد إجابة لهذا السؤال ولكني أرى نفسي في الزي العسكري في الصحراء .. مبروك دخلت الجيش و هتتفشخ بإذن الله 

فكرت أنضم للسلفيين زي أحمد سمير عبد العال  ,,  جايز تبقى دي الحاجة الوحيدة الصح اللي هعملها قبل ما أموت 

____________________________________

أسئلة و إجاباتها النموزجية بالـ "ز"

* طيب إيه مجال الشغل اللي أنت شايف نفسك فيه ؟
- ياااااااه هوا ده السؤال اللي مستنيه من زمان ..

                                                                بعد قليل من التفكير 

                                                                                                    الإجابة : مش عارف 

* طيب بتشرب سجاير أو حشيش أو أي حاجة تانية ؟
- ﻷ .. بشرب شاي أخضر بس .. و ساعات شاي أخضر بالنعناع 

* إيه الحاجة اللي ممكن نقول أنك بتعملها بإمتياز؟

- حاجات كتير أوي .. على سبيل المثال :

1- النوم 

2- القاعدة في البيت 

* من الأخر كدة هتحول من الكلية ولا ﻷ ؟

- بفكر .. و كل شيء جايز في الزمن ده .

* ليه مش شايف أنك تنفع تبقى مهندس مدني ؟

- بإختصار ﻷن المهندس المدني لازم يكون "حرك" [بكسر الراء تقريبا] عشان يعرف يتعامل مع العمال زي +Akram Elbsomy كدة 

* الناس شايفينك إزاي !؟

- 

+Akram Elbsomy : شايفني كئيب

+ahmed tantawy  : شايفني كئيب 

حسام حسن : شايفني : كئيب و بضين و عايش جوا زوبعة " وماحدش يسألني يعني إيه زوبعة "

محمد فريد : شايفني ضحكة :D "بيحب ضحكتي أوي مش عارف ليه "

أحمد سمير عبد العال : شايفني عايش في عالم إفتراضي 

أحمد الشناوي و أمير الزرقاء : شايفيني أخر الرجال المحترمين "بيقلولي كدة من 2 إعدادي لحد دلوقتي "

محمد البسومي : شايفني مصدر خصب لأسطوانات الويندوز 

خالي أشرف : مش شايفني أساسا 

دول الناس اللي عارف هما شايفيني إزي 

الظاهر أن في إجماع على أني كئيب :D 

____________________________________

و أنا بكتب الكلام ده شوفت حاجتين على تويتر حابب أشاركها معاكم 

1- 

أعتقد أني لم أتحرك من السلمة الأولى 

2-

بعد ما قريت التغريدة دي بقيت محتار بين السلحفاة و الكوالا 

____________________________________

نسيت أقول لكم أن عندي أخ أسمه +Adham Samir وظيفته الأساسية في الحياة أنه يفتن ﻷهلي على النتيجة بتاعتي 

غير أنه معقدني بدرجاته 

99.9 % ثانوية عامة 

إمتياز إعدادي هندسة بترول 

أيون أنا بحسده

____________________________________

الموضوع ده مش للنشر ... يعني ماحدش يعمله شير

مش عايز فضايح أرجوكم

و مش عايز ردود فلسفية 

ولو حد يعرف دكتور نفسي شاطر يكتبلي أسمه و عنوانه

أنا تايه يا جدعان